Make your own free website on Tripod.com

Mirza Asad Ullah Khan Ghalib


Dil hi to hai na sang-o-khisht, dard say bhar na aai kiyooN
RoaiN gay hum hazaar baar, koi humaiN sata'ay kiyooN
Der nahiN, haram nahiN, dar nahiN, aastaaN nahiN
Baithay hain rehguzer pay hum, ghair humaiN utha'ay kiyooN
Jab wo jamal-e-dil-farooz, surat-e-mehr-e-neem-roz
Aap hi ho nazaara soz, parday meiN moo'N chupa'ay kiyooN
Qaid-e-hayaat-o-band-e-gham, asl meiN donooN aik haiN
Maut say pehlay aadmi, gham say nijaat pa'ay kiyooN
HaaN wo nahiN Khuda parast, jao wo bewafa sahi
Jis ko hoN deen-o-dil azeez, is ki gali meiN ja'ay kiyooN
Ghalib-e-khasta kay baghair, kon say kaan band haiN
Rooiye zaar zaar kya, keejiye haai haai kiyooN

 
Aah ko chaahiye ik umr asar honay tak
Kon jeeta hai teri zulf kay sar honay tak
Daam her mauj meiN hai, halq-e-sad kaam-e-nihang
DaikhaiN kya guzray hai, qatray pay gohar honay tak
Aashqui sabr talab, or tammana betaab
Dil ka kya rang karooN khoon-e-jigar honay tak
Hum naiN maana keh taghaful na karo gay laikin
Khaak ho jaaiN gay hum tum ko khabar honay tak
Partau-e-khoor say hai shabnam ko fana ki taaleem
Garmi-e-bazm hai ik raqs-e-sharar honay tak
Gham-e-hasti ka Asad kis say ho juz marg ilaaj
Shamma her rang meiN jalti hai sahar honay tak

 
Ghair laiN mehfil meiN bosay jaam kay
Hum rahaiN yooN tishna-lab peghaam kay
Khastagi ka tum say kya shikva keraiN
Hathkanday hain charkh-e-neeli-faam kay
Khat likhaiN gay gerchay matlab kuch na ho
Hum to hain aashiq tumhaaray naam kay
Raat pi zamzam pay ma'e, or sub'h-dum
Dho'ay dhabbay jaama-e-ehraam kay
Dil ko aankhooN naiN phaNsaaya, kya, magar
Yeh bhi halqay haiN tumhaaray daam kay
Shah ki hai ghusl-e-sehat ki khabar
Daikhiye kab din phiraiN hammaam kay
Ishq naiN Ghalib nikamma ker diya
Verna hum bhi aadmi thay kaam kay

 
 
Bazeecha-e-atfaal hai duniya meray aagay
Hota hai shab-e-rooz tamaasha meray aagay
Ik khail hai aurang-e-SulaimaaN meray nazdeek
Ik baat hai Ejaz-e-maseeha meray aagay
Juz naam nahiN surat-e-alam mujhay manzoor
Juz vehm nahiN hasti-e-ashiya meray aagay
Hota nai nihaaN gard meiN sehra meray hotay
Ghista hai jabeeN khaak pay dariya meray aagay
Mut pooch keh kya haal hai mera teray peechay
Tu daikh keh kya rang hai tera meray aagay
ImaaN mujhay rokay hai, jo khiNchay hai mujhay kufr
Kaaba meray peechay hai, kaleesa meray aagay
Aashiq hooN pay mashooq farebi hai mera kaam
MajnooN ko bura kehti hai Laila meray aagay
Khush hotay haiN per vasl meiN yooN mer nahiN jatay
Aaee shab-e-hijraaN ki tamanna meray aagay
Go haath ko jumbish nahiN aankhooN meiN to dam hai
Rehnay do abhi saaghar-o-meena meray aagay
Hum paisha-o-hum mashrab-o-hum raaz hai mera
Ghalib ko bura kiyooN kaho, acha meray aagay

 
Muddat hui hai yaar ko mehmaaN kiay huay
Josh-e-qadah say bazm charaaghaaN kiay huay
Kerta hooN jama phir jigar-e-lakht lakht ko
Arsa hua hai daavat-e-mi'jh'gaaN kiay huay
Phir waza-e-ihtiyaat say ruknay laga hai dam
BarsooN huay hai chaak gareebaaN kiay huay
Phir garm-e-nala haai sharar baar hai nafas
Muddat hui hai sair-e-charaaghaaN kiay huay
Phir pursish-e-jaraahat-e-dil ko chala hai ishq
Samaan-e-sad hazaar namakdaaN kiay huay
Dil phir tavaaf-e-koo-e-malamat ko ja'ay hai
Pindaar ka sanam kaddah veeraaN kiay huay
Phir shoq ker raha hai khareedaar ki talab
Arz-e-mataa-e-aql-o-dil-o-jaaN kiay huay
Mangay hai phir kisi ko lab-e-baam per havass
Zulf-e-siyaah rukh pay pareeshaaN kiay huay
Chaahay hai phir kisi ko muqaabil meiN aarzoo
Surmay say taiz dashna-e-mi'jh'gaaN kiay huay
Ik naubahaar-e-naz ko takay hai phir nigaah
Chehra farogh-e-ma'e say gulistaaN kiay huay
Ji dhoond-ta hai phir wohi fursat kay raat din
Baithay rahaiN tasavur-e-janaaN kiay huay
Ghalib na humaiN chaiR keh phir josh-e-ashk say
Baithay haiN hum tahaiya-e-toofaaN kiay huay

 
Jor say baaz aai per baaz aaiN kya
Kehtay haiN hum tujh ko mooN dikhlaaiN kya
Raat din gardish meiN haiN saat aasmaaN
Ho rahay ga kuch na kuch, ghabraaiN kya
Laag ho to is ko hum samjhaaiN lagao
Jab na ho kuch bhi to dhoka khaaiN kya
Ho liay kiyooN naam-a-bar kay saath saath
Ya Rab apnay khat ko hum pohNchaaiN kya
Mauj-e-khooN sar say guzer hi kiyooN na jai
Aastaan-e-yaar say uth jaaiN kya
Umr bhar daikha kiye mernay ki raah
Mer ga'ay per daikhiye, dikhlaaiN kya
Poochtay haiN wo keh Ghalib kon hai
Koi batlao keh hum batlaiN kya

 
Rahiye ab aisee jaga chal ker jahaaN koi na ho
Hum sukhan koi na ho or hum zubaaN koi na ho
Bay dar-o-deevaar sa ik ghar banaya chaahiye
Koi humsaaya na ho or paasbaaN koi na ho
PaR ga'ay beemaar to koi na ho teemaardaar
Or agar mar jaai'ay to noha khaaN koi na ho